വയറിനകത്തോ വയറിനുപുറത്തെ മാംസപേശികളിലോ അനുഭവപ്പെടാവുന്നതാണ് വയറുവേദന.ഇവ താൽക്കാലികമായി അനുഭവപ്പെടുന്നതോ സാവധാനം വഷളാകുന്നവയോ അടിയന്തര ഇടപെടൽ ആവശ്യമുള്ളവിധം പെട്ടെന്ന് വർദ്ധിക്കുന്നവയോ ആകാം.
മലബന്ധം,ഗ്യാസ്,അമിതഭക്ഷണം,അത്കാരണമുള്ള ദഹനക്കേട്,ടെൻഷൻ, മാംസപേശികൾക്കുണ്ടാ കുന്ന വലിവ് എന്നിവ കാരണമാണ് സാധാരണയായി വയറു വേദന ഉണ്ടാകുന്നത്.
പിത്താശയത്തിലുണ്ടാകുന്ന കല്ല് (ഗൾബ്ളാഡർ സ്റ്റോൺ അഥവാ കോളിലിത്തിയാസിസ് ), ഗൾബ്ലാഡറിലുണ്ടാകുന്ന വീക്കം ( കോളീസിസ്റ്റൈറ്റിസ് ) ഗർഭം,അൾസറേറ്റീവ് കൊളൈറ്റിസ്,ക്രോൺസ് ഡിസീസ്,അണുബാധ, പാൻക്രിയാറ്റൈറ്റിസ്, അപ്പന്റിസൈറ്റിസ്, അൾസർ,ഗ്യാസ്ട്രൈറ്റിസ്, ഗ്യാസ്ട്രോ ഇസോഫാജിയൽ റിഫ്ലക്സ് ഡിസീസ് (ജി.ഇ.ആർ.ഡി), ഹെപ്പറ്റൈറ്റിസ്, വിരകളുടെ ഉപദ്രവം, കിഡ്നി സ്റ്റോൺ, ആർത്തവ സംബന്ധമായ ചില രോഗങ്ങൾ, ഹെർണിയ,പാലും ഗോതമ്പും ദഹിപ്പിക്കുവാൻ കഴിയാത്ത അവസ്ഥ, അപകടം കാരണമുള്ള ക്ഷതം,വിഷാംശം കലർന്ന ഭക്ഷണം കഴിക്കുന്നത് കാരണമുള്ള ഫുഡ് പോയിസണിംഗ് തുടങ്ങിയ അവസ്ഥളിലും വയറുവേദന ഉണ്ടാകും.
വയറുവേദന അനുഭവപ്പെട്ടാലുടൻ ഇവയിലേത് കാരണമാണെന്നറിയാതെ വേദനാസംഹാരികൾ കഴിക്കുന്നത് ഗുണത്തേക്കാളേറെ ദോഷം ചെയ്യുവാനാണ് സാദ്ധ്യത.
പെട്ടെന്നുണ്ടാകുന്ന അതികഠിനമായ വയറുവേദനയ്ക്കൊപ്പം നെഞ്ചുവേദന,കഴുത്തു വേദന,തോൾഭാഗത്ത് വേദന,രക്തം ഛർദ്ദിക്കുക,രക്തം കലർന്നമലം വയറിളകി പോകുക,കറുത്ത നിറത്തിലുള്ള മലം പോകുക എന്നിവകൂടി കണ്ടാൽ പെട്ടെന്നുള്ള രോഗനിർണ്ണയവും ചികിത്സയും ആവശ്യമാണ്.
വയറിനോടടുത്ത ആന്തരിക അവയവങ്ങൾക്കുണ്ടാകുന്ന കുഴപ്പങ്ങളും വയറിലുള്ള വേദനയായി അനുഭവപ്പെടാം.
ചൂട്പിടിച്ച് വയറുവേദന കുറയ്ക്കുന്നവരും കോഫീ,ചായ,ചാരായം എന്നിവ കുടിച്ച് വയറുവേദന കൂട്ടുന്നവരുമുണ്ട്. ആവശ്യത്തിന് ചൂടാറ്റിയവെള്ളം കുടിക്കുന്നത് വയറുവേദന കുറയുവാൻ ഒരു പരിധിവരെ നല്ലതാണ്.
വയറുവേദനയ്ക്കൊപ്പം പനി,തുടർച്ചയായി ഛർദ്ദിക്കുക,ശ്വാസം കിട്ടാൻ പ്രയാസമനുഭവപ്പെടുക, ചിലപ്പോൾ ദിവസം മുഴുവൻ നീണ്ടു നിൽക്കുന്നവിധമുള്ള വേദനയുണ്ടാകുക, ഒരിടത്തുതന്നെ തുടർച്ചയായി വേദന അനുഭവപ്പെടുക എന്നിവകണ്ടാൽ കൂടുതൽ ശ്രദ്ധിക്കേണ്ടതാണ്.
വയറുനിറഞ്ഞപോലെ ചലിപ്പിക്കാൻ പറ്റാതിരിക്കുക,വയറിന് വീക്കം തോന്നിക്കുക, തൊട്ടാൽ വേദനിക്കുക എന്നിവ ഗ്യാസ് നിറഞ്ഞുള്ള ബുദ്ധിമുട്ടാകാനാണ് സാദ്ധ്യത.
വയറിന്റെ വലതുവശത്ത് താഴ്ഭാഗത്ത് താഴേക്ക് നീങ്ങുന്ന പോലുള്ള വേദന,വിശപ്പില്ലായ്മ, വേദന ആരംഭിക്കുമ്പോൾ തന്നെ ഓക്കാനിക്കുകയും ഛർദ്ദിക്കുകയും ചെയ്യുക,വയർ വീർത്തിരിക്കുക,വർദ്ധിച്ച പനി,ഗ്യാസ് പോകാതിരിക്കുക എന്നിവ അപ്പന്റിസൈറ്റിസിന്റെ ലക്ഷണമാകാം.
അക്യൂട്ട് പാൻക്രിയാറ്റൈറ്റിസിൽ നിവർന്നുനിൽക്കുവാൻ പോലും പ്രയാസമുള്ളവിധം വയറുവേദനയും ഭക്ഷണം കഴിച്ചാൽ വേദന വർദ്ധിക്കുകയും മുതുക് വേദനയും ചിലപ്പോർ രക്തംപോക്കുമുണ്ടാകാം.
രണ്ട് ആർത്തവ സമയത്തിനിടയ്ക്കുള്ള ഓവുലേഷൻ (അണ്ഡവിസർജ്ജന)സമയത്തും വയറുവേദനയുണ്ടാകുന്ന വരുണ്ട്.ഇതിൽ ഒരുവശത്ത് മാത്രമുള്ള വേദന,അടിവയർ വേദന, കാലുകളിലെ മസിലുപിടുത്തം,ഇടുപ്പ് വേദന എന്നിവയും കാണാം.
വെള്ളപോക്കിന്റെ അസുഖമുള്ളവർക്കും വയറെരിച്ചിലോട്കൂടിയ വയറുവേദനയുണ്ടാകാം.
കൃമിയുടേയോ വിരയുടേയോ ശല്യമുള്ള കുട്ടികൾക്ക് ഉഴുന്ന്,തൈര്,പായസം, മധുരം,ഐസ് ക്രീം,സിപ്പപ്, തലേ ദിവസത്തെ ഭക്ഷണം എന്നിവ നിയന്ത്രിക്കണം. വിരയ്ക്കുള്ള മരുന്നുകളും കൃത്യമായ ഇടവേളകളിൽ നൽകണം.പുറത്ത് ഗ്രൗണ്ടിൽ പോയി കളിക്കുന്നവർ തിരികെ വീട്ടിൽ കയറുന്നതിനുമുമ്പ് വൃത്തിയായി കൈകാലുകൾ കഴുകുകയും കുളിക്കുകയും ചെയ്യണം. നഖങ്ങൾക്കിടയിൽ അഴുക്കിരിക്കുവാൻ അനുവദിക്കരുത്. നഖങ്ങൾ സമയത്ത് മുറിച്ച് വൃത്തിയാക്കണം. വൃത്തിയില്ലാതെ ഭക്ഷണ സാധനങ്ങളിൽ തൊടരുത്.
കുടലുകൾക്ക് സംഭവിക്കുന്ന അണുബാധകളും വയറുവേദനയ്ക്ക് കാരണമാകാറുണ്ട്.
രോഗനിർണ്ണയത്തിനായി രക്തപരിശോധന, മൂത്രപരിശോധന, അൾട്രാസൗണ്ട് പരിശോധന എന്നിവ കൂടി മറ്റ് രോഗീ പരിശോധനകൾക്കൊപ്പം നടത്തേണ്ടതുണ്ട്.
താൽക്കാലിക ചികിത്സകൾ കൊണ്ട് വയറുവേദനയ്ക്ക് കൃത്യമായ ഗുണം കിട്ടാറില്ല.അതിനാൽ രോഗമറിയാതെ മരുന്നുപയോഗിച്ചാൽ രോഗം വർദ്ധിക്കുവാനിടയുണ്ട്. ഗുളികകൾ,ചൂർണ്ണങ്ങൾ, അരിഷ്ടങ്ങൾ,ലേഹ്യങ്ങൾ തുടങ്ങിയ മരുന്നുകളാണ് ആയുർവേദത്തിൽ വയറുവേദനയ്ക്ക് കൂടുതലായി ഉപയോഗിക്കുന്നത്.
ദഹനസംബന്ധമായ പ്രശ്നങ്ങൾ കാരണമുണ്ടാകുന്ന താൽക്കാലിക വേദനകൾപോലെ സ്ഥിരമായ വേദനകളെ കാണരുത്. ദഹനസംബന്ധമായ പ്രശ്നങ്ങൾ സ്ഥിരമായി ഉള്ളവർക്ക്പോലും കൂടുതൽനാൾ മരുന്നു കഴിച്ചു മാത്രമേ അവ പരിഹരിക്കാനാകു. ആയതിനാൽ കാരണമറിഞ്ഞ് തന്നെ ചികിത്സ ചെയ്യണം. അല്ലാതെ വയറിന് എന്ത് വേദന വന്നാലും ഇഞ്ചിനീരും കയ്യിൽ സ്റ്റോക്കുള്ള ഏതെങ്കിലുമൊക്കെ അരിഷ്ടവും കോളയും സോഡയും സോഡാ നാരങ്ങാവെള്ളവും കുടിച്ച് ‘ഞാൻ ആയുർവേദവും നോക്കിയതാ’എന്ന് പറയരുത്.അൾസർ കാരണമുള്ള വേദനയാണെങ്കിൽ അത് വർദ്ധിക്കുവാനും ഇതൊക്കെത്തന്നെ മതിയാകും.ആന്തരിക രക്തസ്രാവം ( പ്രത്യേകിച്ചും കുടലിനുള്ളിൽ അൾസർ ഉള്ളവരിൽ ) വർദ്ധിപ്പിക്കുന്ന മരുന്നുകളാണ് വേദനാസംഹാരികൾ എന്നതിനാൽ അവ ഒഴിവാക്കണം.എന്നാൽ ഇത്തരം സാഹചര്യങ്ങളിൽ മറ്റാരുടെയെങ്കിലും വേദന ശമിപ്പിക്കുവാനായി ഡോക്ടർ നൽകിയ മരുന്ന് കഴിക്കുന്ന പലരെയും കണ്ടിട്ടുണ്ട്.ആർത്തവ സംബന്ധമായ വേദനയുള്ളവർ സ്ഥിരമായി ഇവ കഴിക്കുന്നവരുമുണ്ട്. അവർക്കും അൾസർ കൂടിയുണ്ടെങ്കിൽ അത് കുഴപ്പം ചെയ്യുമെന്ന് മനസ്സിലായല്ലോ ?
വീഴ്ച സംഭവിച്ചോ അപകടങ്ങളിൽപെട്ടോ അടിപിടികൂടിയോ വയറിന് ക്ഷതമേറ്റവർ പെട്ടെന്നുള്ള വയറുവേദന കാരണം ഡോക്ടറെ സമീപിക്കുമ്പോൾ നിർബന്ധമായും അവർക്ക് സംഭവിച്ച ഇത്തരം കാര്യങ്ങൾ ഡോക്ടറോടു പറയണം. കാരണം അത്തരം ക്ഷതങ്ങൾ കാരണം ആന്തരികരക്തസ്രാവം ഉണ്ടായിട്ടില്ലെന്ന് ഉറപ്പാക്കേണ്ടതുണ്ട്.
ആന്തരിക രക്തസ്രാവമുള്ള രോഗിക്ക് രക്തസമ്മർദ്ദം കുറഞ്ഞ് അപകടനിലയിലേക്ക് എത്തുവാൻ സാദ്ധ്യത കൂടുതലാണ്.
ഡോ.ഷർമദ് ഖാൻ
9447963481
