നട്ടെല്ലിന്റെ പല ഭാഗത്തും വേദനയുണ്ടാകാം. അതിനെല്ലാം പല കാരണങ്ങളുമുണ്ടാകാം. നട്ടെല്ലിനോട് ചേർന്ന് ഇടുപ്പിലുണ്ടാകുന്ന വേദനയെയാണ് പൊതുവെ നടുവേദനയെന്ന് പറയുന്നത്.
ജീവിതത്തിലൊരിക്കലെങ്കിലും നടുവേദന അനുഭവിച്ചിട്ടില്ലാത്തവർ വളരെ വിരളമാണ്. നിസ്സാരമായവ മുതൽ ചികിത്സിച്ചു ഭേദമാക്കുവാൻ പ്രയാസമുള്ള പ്രശ്നങ്ങൾവരെ നടുവേദനയ്ക്ക് കാരണമാകാറുണ്ട്. കുട്ടികളെന്നോ പ്രായമായവരെന്നോ ഉള്ള വ്യത്യാസമൊന്നും നടുവേദനയ്ക്കില്ല. പൊതുവെ ശാരീരിക സ്ഥിതിയുടെ വ്യത്യാസംകൊണ്ട് സ്ത്രീകൾക്കും മുതിർന്നവർക്കും നടുവേദന ഉണ്ടാകുവാൻ സാദ്ധ്യത കൂടുതലുണ്ട് എന്ന് മാത്രമേ പറയാനാകൂ.
അസ്ഥിമാംസങ്ങൾക്ക് ബലക്കുറവ്, കാൽസ്യത്തിന്റേയും വൈറ്റമിൻ ഡി 3യുടേയും അളവ് കുറവ്, സൈക്കിൾ അമിതമായി ചവിട്ടുക,അൽപംപോലും വെയിൽ കൊള്ളാതിരിക്കുക, ശരിയായ ഭക്ഷണം കഴിക്കാതിരിക്കുക ഡാൻസ് കളിക്കുക,വല്ലപ്പോഴുമുള്ള വ്യായാമം തുടങ്ങിയവയുള്ള കുട്ടികളും മുതിർന്നവരെപ്പോലെ നടുവേദന പറയാറുണ്ട്.
ചിലർ ഇതോടൊപ്പം കാലിലെ അസ്ഥികൾക്കും വേദന പറയാറുണ്ട്. വളരുന്ന പ്രായത്തിൽ കാൽസ്യത്തിന്റെ അളവ് കുറവുള്ളവരും കൂടുതൽ ആവശ്യമായി വരുമ്പോഴും പ്രത്യേകിച്ചും വേദനയുണ്ടാകും.
ഗർഭാവസ്ഥ, തുടർച്ചയായ പ്രസവങ്ങൾ, മുലയൂട്ടൽ, പലതരം രോഗങ്ങൾ, തൈറോയ്ഡ്,ചില മരുന്നുകൾ, വിശ്രമമില്ലാത്ത ജോലി, അമിതവണ്ണം,വളരെനേരം നിന്നുകൊണ്ടുള്ള ജോലി, അമിതമായി മധുരവും കൃത്രിമ ആഹാരവും കഴിക്കുക, കാലുകൾക്കും കാൽമുട്ടിലും ഉപ്പൂറ്റിയിലുമുള്ള താൽക്കാലികവും സ്ഥിരവുമായ രോഗങ്ങൾ, വെരിക്കോസ് വെയിൻ, അർശസ്,ഗർഭപാത്രസംബന്ധമായ രോഗങ്ങൾ,വെള്ളപോക്ക്,ആർത്തവപ്രശ്നങ്ങൾ തുടങ്ങിയവയാണ് സ്ത്രീകളിൽ പ്രധാനമായി കാണുന്ന നടുവേദനയുടെ കാരണങ്ങൾ.
അമിതാദ്ധ്വാനം, ഒരേ രീതിയിലുള്ള ജോലികൾ, കാൽമുട്ട് വേദന,മറ്റ് രോഗങ്ങൾ,മലബന്ധം, വിശ്രമമില്ലാത്ത ജോലി, കിഡ്നി രോഗങ്ങൾ, കല്ലിന്റെ അസുഖം, സന്ധികൾക്ക് ഉണ്ടാകുന്ന വീക്കം,തേയ്മാനം, കശേരുകകൾക്ക് ഉണ്ടാകുന്ന സ്ഥാനചലനം, ഞരമ്പുകൾക്കുണ്ടാകുന്ന തടസ്സം,ശരിയായ ചികിത്സ ചെയ്യാതെ വഷളാക്കുന്ന രോഗങ്ങൾ തുടങ്ങിയവ കൂടി മറ്റുള്ളവരിൽ രോഗ കാരണമാകാറുണ്ട്.
അമിതമായ ടെൻഷൻ, ഉറക്കമില്ലായ്മ, അമിതാദ്ധ്വാനം, വിശ്രമമില്ലായ്മ, എങ്ങനെയെങ്കിലും ഇരിക്കുകയും കിടക്കുകയും ചെയ്യുക, തണുപ്പ്,മഴ,അധികമായി തണുപ്പേൽക്കുക,ദഹന സംബന്ധമായ ബുദ്ധിമുട്ടുകൾ തുടങ്ങിയവ എല്ലാവരിലും നടുവേദന ഉണ്ടാക്കുകയും ഉള്ളതിനെ വർദ്ധിപ്പിക്കുകയും ചെയ്യും.
നടുവേദനയുള്ളവർ വേദനാസംഹാരികൾ ഉപയോഗിക്കുകയോ ഏതെങ്കിലും തൈലം വാങ്ങി തിരുമ്മുകയോ ചെയ്യുന്നത് കണ്ടിട്ടുണ്ട്. ഇവരണ്ടും ശരിയായ ചികിത്സയല്ല. വേദനാസംഹാരികൾ താൽക്കാലിക ശമനം നൽകുമെങ്കിലും അവ തുടർച്ചയായി ഉപയോഗിച്ചാൽ മാത്രമേ ശമനമുണ്ടാകൂ എന്ന അവസ്ഥയും, തുടർച്ചയായി ഉപയോഗിക്കുന്നത് കാരണമുള്ള ബുദ്ധിമുട്ടുകളുമുണ്ടാകും.രോഗത്തിന്റെ സ്വഭാവം മനസ്സിലാക്കാതെ തൈലം വാങ്ങി തിരുമ്മുന്നവർ ഉള്ള രോഗം വർദ്ധിക്കുവാൻ സ്വയം കാരണമാകുന്നതായി കണ്ടിട്ടുണ്ട്.ഏത് തൈലമാണ് നല്ലതെന്നോ, മറ്റു മരുന്നുകൾ കൂടി ഉപയോഗിക്കേണ്ട രോഗമാണോ,തടവിയാൽ കുറയുന്ന രോഗാവസ്ഥയാണോ, മറ്റേതെങ്കിലും രോഗവുമായി ബന്ധപ്പെട്ട നടുവേദനയാണോ എന്നൊന്നും മനസ്സിലാക്കാതെ തൈലം നന്നായി തിരുമ്മി അസുഖം വർദ്ധിപ്പിക്കുന്നവരും ധാരാളമുണ്ട്.
ചിലർക്കെങ്കിലും മരുന്ന് കഴിച്ചാലുടൻ വേദന മാറണം.അസുഖത്തിന്റെ സ്വഭാവം എന്തുതന്നെയായിരുന്നാലും അഥവാ അസുഖം കുറഞ്ഞില്ലെങ്കിലും വേദന മാറണമെന്നാണ് അവർ ആവശ്യപ്പെടുന്നത്. ആയുർവേദത്തിൽ താൽക്കാലിക രോഗശമനത്തിന് അത്ര പ്രാധാന്യമില്ല.അതല്ല ആയുർവേദ ചികിത്സയുടെ ഉദ്ദേശവും. മരുന്നുപയോഗിച്ച് രോഗം കുറയുന്ന മുറയ്ക്ക് രോഗത്തിന്റെ ലക്ഷണങ്ങളും കുറഞ്ഞുവരും. അതിനാൽ ഒരല്പം സാവകാശമുള്ളവരാണ് ആയുർവേദചികിത്സയിലേക്ക് പോകേണ്ടത്. മരുന്നുപയോഗിച്ച് വീട്ടിലിരുന്നും, ആശുപത്രിയിൽ കിടന്ന് പഞ്ചകർമ്മ ചികിത്സകൾക്ക് വിധേയമായും ചികിത്സിക്കേണ്ടി വരാം.തടവും കിഴിയും മാത്രമാണ് നടുവേദനയുടെ ചികിത്സ എന്ന് ആരും ചിന്തിച്ചു കളയരുത്. ചികിത്സ തേടുന്നത് ശരിയായ വിദ്യാഭ്യാസ യോഗ്യതയുള്ളവരിൽ നിന്നു തന്നെ ആയിരിക്കുകയും വേണം.ഏതുതരം നടുവേദനയും തിരുമ്മി കുറയ്ക്കുവാൻ ശ്രമിക്കുന്നത് കൂടുതൽ പ്രശ്നങ്ങൾക്ക് കാരണമായേക്കാം. വേദനയുള്ളപ്പോൾ വിശ്രമംകൂടി നൽകാതെ നടുവേദനയ്ക്കുള്ള ചികിത്സമാത്രം ചെയ്തിട്ട് കാര്യമില്ല.
സർക്കാർ ആയുർവേദ സ്ഥാപനങ്ങളിൽ നിന്നും ലഭിക്കുന്ന ചികിത്സകൾ സൗജന്യമാണ്. വീട്ടിലിരുന്ന് മരുന്ന് കഴിക്കുവാനേ നിർവാഹമുള്ളൂ എന്നുള്ളവർക്ക് രോഗത്തിന്റെ പ്രാരംഭ ഘട്ടത്തിൽ ആയുർവേദ ഡിസ്പെൻസറികളിൽ നിന്നും, കിടത്തിചികിത്സ അനിവാര്യമായിരിക്കുന്നവർക്ക് ആയുർവേദ ആശുപത്രികളിൽ നിന്നും ചികിത്സ ലഭിക്കും.രോഗവർദ്ധനവിനെ ഉണ്ടാക്കുന്ന അപഥ്യങ്ങൾ ഒഴിവാക്കിയും രോഗശമനത്തിനായുള്ളകാര്യങ്ങൾ ഉൾപ്പെടുത്തിയും നടുവേദനയ്ക്കുള്ള ആയുർവേദ ചികിത്സ ഫലപ്രദമാക്കാം.
പല രോഗങ്ങളിലും വേദന ഒരു പ്രധാന ലക്ഷണമാണെന്ന് അറിയാമല്ലോ?എന്നാൽ നീരും വേദനയും ഒരുമിച്ച് ഉണ്ടാകുമ്പോൾ സന്ധികൾ അനക്കുവാൻ പോലും കഴിയാത്ത അവസ്ഥ ഒരിക്കലെങ്കിലും അനുഭവിച്ചവർ പെട്ടെന്ന് മറക്കാൻ ഇടയില്ല.
രാത്രി ഭക്ഷണം കഴിച്ച് ഉടനെ ഉറങ്ങുന്നതും ശരീരം തണുത്തിരിക്കുമ്പോൾ തണുത്ത വെള്ളത്തിൽ കുളിക്കുന്നതും തണുപ്പ് ഉണ്ടാക്കുന്ന ആഹാരം കൂടുതൽ കഴിക്കുന്നതും തണുപ്പിനെ പ്രതിരോധിക്കാൻ ശ്രദ്ധിക്കാത്ത രീതിയിൽ ശരീര ഭാഗങ്ങളിൽ തണുപ്പേൽക്കുന്നതും അമിത അദ്ധ്വാനവും വേദന വർദ്ധിക്കാൻ കാരണമാകുന്നു.
നട്ടെല്ലിന്റെ കശേരുകകൾക്കുണ്ടായ സ്ഥാനചലനം, കശേരുകകൾക്കിടയിലുള്ള ഡിസ്കിനുണ്ടാകുന്ന തേയ്മാനം, അതിനോടൊപ്പം സംഭവിക്കുന്ന അകത്തേക്കോ പുറത്തേക്കോ ഉള്ള ഡിസ്ക് തള്ളൽ,സ്പൈനൽ കോഡിനുണ്ടാകുന്ന സമ്മർദ്ദം,വാതരക്തം, ക്യാൻസർ,ചില സ്ത്രീരോഗങ്ങൾ തുടങ്ങി പല കാരണങ്ങളാണ് നടുവേദനയുണ്ടാക്കുന്നത്.എന്നാൽ ഒരു ഉളുക്ക്പോലെ കണ്ട് ഇപ്പോൾതന്നെ കുറയണമെന്ന രീതിയിൽ ചികിത്സയെ സമീപിക്കുന്നവർ ശരിയായി കാര്യങ്ങൾ തിരിച്ചറിയേണ്ടതുണ്ട്.
സർജറി നിർദ്ദേശിക്കുന്ന പല അവസ്ഥകളിലും അതില്ലാതെതന്നെ ആയുർവേദചികിത്സ കൊണ്ട് നടുവേദന മാറ്റാം.സർജറിക്ക്ശേഷം മുൻപുണ്ടായിരുന്ന ബുദ്ധിമുട്ടുകൾ വീണ്ടുമുണ്ടാകുന്നവരിലും ആയുർവേദം ഫലപ്രദമാണ്.
ഡോ.ഷർമദ് ഖാൻ
9447963481
