തിരഞ്ഞെടുപ്പുകാലമാണ്. ഒരേ ചേരിയിൽനിന്നു മത്സരിച്ചുജയിച്ചശേഷം, കൂട്ടത്തിലെ ചിലരെ തേച്ചിട്ട് ഒറ്റയ്ക്കു ഭരിക്കുന്ന ചില വലിയ രാഷ്ടീയപ്പാർട്ടികളെ കണ്ടിട്ടില്ലേ. സത്യത്തിൽ ഇത്തരംതേപ്പ് ഇന്നും ഇന്നലെയും തുടങ്ങിയതല്ല എന്ന് ഐതിഹ്യങ്ങൾ വായിച്ചാൽ മനസിലാക്കും. ദേവന്മാരും അസുരന്മാരും ഒത്തുചേർന്ന് അമൃതിനായി പാലാഴി കടഞ്ഞുവത്രെ. അമൃതകുംഭം കിട്ടിയപ്പോൾ ആദ്യം അസുരന്മാർ അത് കൈക്കലാക്കി കടന്നുകളഞ്ഞു. ഭഗവാൻ വിഷ്ണു മോഹിനിരൂപത്തിൽ അസുരന്മാരുടെ ഇടയിൽ കടന്നുചെന്ന് അതു തിരികെ ദേവലോകത്തെത്തിച്ചു.ഇങ്ങനെ തേപ്പും , മറുതേപ്പും കഴിഞ്ഞ് മോഹിനിവേഷത്തിൽത്തന്നെ ഭഗവാൻ എല്ലാ ദേവന്മാർക്കും അമൃത് പകർന്നുനൽകാൻ തുടങ്ങി. അസുരവംശജരായ രാഹുവും കേതുവും ദേവവേഷത്തിൽ ദേവന്മാരുടെ ഇടയിൽ കടന്നത് അമൃതുവിളമ്പിക്കഴിഞ്ഞ ശേഷമാണ് വിഷ്ണു ഭഗവാനു മനസ്സിലായത് . അദ്ദേഹം പെട്ടെന്നുതന്നെ സ്വരൂപംധരിച്ചു സുദർശനചക്രംകൊണ്ട് അമൃത് പാനംചെയ്തുകൊണ്ടിരുന്ന രാഹുവിന്റേയും കേതുവിന്റേയും കഴുത്തറക്കുകയും അമൃത് അവരുടെ ശരീരത്തിലെത്താതെ പോകുകയും ചെയ്തു.രാഹുവിന്റേയും , കേതുവിന്റേയും മുറിഞ്ഞ കഴുത്തിൽ നിന്നിറ്റുവീണ അമൃതതുള്ളികളിൽ ചിലത് ഭൂമിയിൽ വീഴുകയും അത് വെളുത്തുള്ളിയായി വളരുകയും ചെയ്തു എന്നാണ് ഐതിഹ്യം. ഈ ക്രൂരകൃത്യം നടന്നത് ചൈനയുടെ ആകാശത്തിലാകാനാണ് സാധ്യത. ലോകത്തിലെ വെളുത്തുള്ളി ഉത്പാദനം ഏറ്റവും കൂടുതൽ ചൈനയിലാണത്രേ .ലില്ലിയേസിയേ ഫാമിലിക്കാരനായ അല്ലിയം സറ്റൈവം എന്ന ശാസ്ത്രീയ നാമധാരിയെ അന്നുമുതൽ ബ്രാഹ്മണർ കഴിക്കാറില്ല.
ഭാരതത്തിലെങ്ങും കൃഷിചെയ്യപ്പെടുന്ന ഒരു വിളയാണ് വെള്ളുള്ളി . പുളിരസമൊഴിച്ചുള്ള അഞ്ചുരസങ്ങളും ഇതിലുണ്ട്. വാതരോഗികൾക്ക് , പ്രത്യേകിച്ച്, ചലനത്തിനു കുറവുണ്ടാകുന്ന , ശരീരത്തിന് ഗൗരവമുണ്ടാകുന്ന കഫത്തോടുചേർന്ന വാതരോഗങ്ങളിലും, വാതത്തിന്റെ ചലനത്തെ തടയുന്ന ആവരണവാതത്തിലും ഇവന്റെ ഗുണം ഏറ്റവും പ്രസിദ്ധമാണ്.ലശുനം മേധ്യമാണ്, അതായത് ബുദ്ധിയെ വർദ്ധിപ്പിക്കുന്നതാണെന്ന് എല്ലാഗ്രന്ഥങ്ങളും പറയുന്നു.
ഫോളിക്കാസിഡ്‌ അടങ്ങിയിരിക്കുന്നതിനാൽ ഗർഭത്തിന്റെ ആദ്യ ആഴ്ചകളിൽ ഗർഭസ്ഥ ശിശുവിന്റെ ബുദ്ധിവികാസം ഉറപ്പുവരുത്തുന്ന വെള്ളുള്ളി കൊളസ്ട്രോൾ കുറച്ച് തലച്ചോറിലേക്കുള്ള രക്തപ്രവാഹം വർദ്ധിപ്പിച്ച് മുതിർന്നവരിലും ബുദ്ധിയെ മങ്ങാതെകാക്കുന്നു. ലശുനം പാലിൽ കാച്ചി ഉപയോഗിക്കുന്ന ലശുന ക്ഷീരം വാതരോഗങ്ങൾക്കൊപ്പം കരൾ, പ്ലീഹാവൃദ്ധി കുറയ്ക്കുന്നതും സ്ത്രീരോഗങ്ങളിൽ ഫലം തരുന്നതുമാണ്.ദഹനത്തിന് കോശങ്ങളുടെ തലത്തിൽതന്നെ കുറവുണ്ടാകുന്ന ആമവാതം എന്ന അവസ്ഥയിലും ലശുനം എന്ന വെള്ളുള്ളി വിശിഷ്ട ഔഷധമാണ്. രക്തത്തിലെ ഗ്ലൂക്കോസിന്റെ അളവു കുറയ്ക്കുന്നതിനാൽ പ്രമേഹരോഗികൾക്ക് പത്ഥ്യമാണ്. സ്നിഗ്ദത, ഉഷ്ണവീര്യം, മലത്തെ ഇളക്കുന്ന സ്വഭാവം ഇവ മൂലം അർശസുള്ളവർക്കും നന്ന്. റുമറ്റോയിഡ് ആർത്രയിറ്റിസ് എന്ന രക്തപരിശോധനയിലൂടെ വാതമെന്ന് ഉറപ്പിക്കാവുന്ന അവസ്ഥയിൽ വെള്ളുള്ളിയിലെ അല്ലിൻ എന്ന രാസവസ്തു ഗുണമാണെന്ന് തെളിയിക്കപ്പെട്ടിട്ടുള്ള വസ്തുതയാണ്.
നേരിട്ട് ഹൃദയദൗർബല്യം കൊണ്ടല്ലാതെ കൊളസ്ട്രോൾ മുതലായവ അധികമായതു കൊണ്ടുണ്ടാകുന്ന BP (രക്താതിമർദ്ദ ) രോഗികൾക്ക് കറിവേപ്പില , വെള്ളുള്ളി, കൊത്തമല്ലി ഇവചേർത്തു തിളപ്പിച്ചവെള്ളം മരുന്നിനൊപ്പം കഴിക്കാൻ കൊടുത്താൽ മരുന്നിന്റെ ഡോസ് ക്രമേണ കുറയ്ക്കാൻ കഴിയും. രക്തദുഷ്ടി ഉള്ളവരും ചുട്ടുനീറ്റൽ , പുളിച്ചു തികട്ടൽ എന്നിവ പോലുള്ള പിത്ത പ്രധാന ദുഷ്ടികൾ ഉള്ളവരും ഒരു കാരണവശാലും വെള്ളുള്ളി ഉപയോഗിക്കാൻ പാടില്ല എന്നതിനാൽ നിങ്ങളുടെ ഡോക്ടറുടെ നിർദ്ദേശപ്രകാരം മാത്രമെ വെളുത്തുള്ളി രോഗാവസ്ഥകളിൽ ഉപയോഗിക്കാവു.അമൃതിൽ നിന്നുയിർ കൊണ്ടതായതിനാൽ ഏറ്റവും രസായനമായ ഒരുമരുന്നാണ് വെളുത്തുള്ളി. പക്ഷെ സേവിക്കുന്നതിനു മുൻപ് നെയ്യു കഴിച്ച് ശരീരം സ്നിഗ്ദമാക്കി വയറിളക്കി ശുദ്ധമാക്കിവേണം കഴിക്കാൻ . അത് കഫരോഗികളിൽ ഹേമന്ദം, ശിശിരം, വസന്തം ഈ ഋതുക്കളിലും, വാത രോഗികളിൽ വർഷ കാലത്തുമാണ് ചെയ്യേണ്ടത്. ചൂടുകാലത്തെ ഉപചാരങ്ങളും ശ്രദ്ധയും പരിചരണവും ചെയ്തു കൊണ്ട് ഏതു കാലത്തും അത്യാവശ്യമെങ്കിൽ കഴിക്കാം.
അമിതമായി വെള്ളം കുടിക്കുന്ന ശീലമുള്ളവർ, ദിവസവും പാൽ കുടിക്കുന്നവർ, അമിതമായി ശർക്കര ചേർന്നവ ഭക്ഷിക്കുന്നവർ എന്നിവർക്ക് ഉള്ളിരസായനം നൽകരുത്. മാംസരസം , മദ്യം, പുളിയുള്ള ദ്രവ്യങ്ങൾ ഇവ ഉള്ളിനീരിനൊപ്പം നൽകുന്നതിനാൽ അവ ഉപയോഗിക്കാത്തവരേയും ഉള്ളി രസായന സേവയിൽ നിന്നും ഒഴിവാക്കണം.
വെള്ളുള്ളിയുടെ നിങ്ങൾക്കറിയാവുന്ന പൊടിക്കൈകൾ കുറുക്കി ഞായറാഴ്ചക്കുറുക്ക് സ്വാദിഷ്ഠമാക്കാൻ ഏവരേയും ക്ഷണിക്കുന്നു.
സ്നേഹപൂർവ്വം ഡോ. ശ്രീനി രാമചന്ദ്രൻ
